Mae gwirfoddolwyr gwau Canolfan y Glowyr Caerffili wedi ehangu eu prosiect blynyddol Blancedi Nadolig eleni. Cafodd y prosiect, a ddeilliodd yn wreiddiol o Brosiect Coed Nadolig Undeb Mamau Plwyf Caerffili, ei adfywio yn 2020 fel ffordd o ysgogi pobl leol trwy gyfnodau cloi Covid ac mae wedi parhau fel ffordd o gadw pobl yn gysylltiedig a'i gilydd.

Eleni, rydym wedi derbyn bagiau o betryalau wedi'u gwau o gyn belled â Gwlad yr Haf, y Rhondda a Chaerdydd, yn ogystal â llawer, llawer mwy gan wirfoddolwyr lleol. Mae dros 40 o bobl o bob oed wedi cymryd rhan, o weuwyr a chroswyr yn eu 20au a’u 30au i’r rheini ymhell yn eu 80au. Mae mwy na 60 o flancedi wedi cael eu gwau a’u crosio’n gariadus at ei gilydd eleni. Mae pob blanced yn cynnwys 25 sgwâr sy'n cymryd tua 25 awr i'w gwau ac o leiaf 6 neu 7 awr arall i'w crosio at ei gilydd. Dyma ryw 1800 - 1900 0 oriau gwirfoddoli.

Mae'r gwirfoddolwyr wedi croesawu’r cyfle i gyfrannu at brosiect mor werth chweil ac mae wedi eu cadw i fynd trwy adeg lle roedd mwy o amser gartref a llai o gyfleoedd i weld eraill a chymdeithasu. Maent i gyd wedi mwynhau bod yn rhan o fenter leol sydd hefyd yn helpu eraill.

Dywedodd un o'n gweuwyr gwirfoddol, Caroline Kitson, wrthym sut roedd hi'n teimlo pan ddaeth i mewn i gyflwyno ei phetryalau:

'Rydw i wedi bod yn gwau petryalau blanced ers i'r pandemig ddechrau ym mis Mawrth 2020. Roeddwn i'n teimlo'n eithaf emosiynol yn cludo bron i 50 i'r Ganolfan heddiw, nid yn unig am fod y gwau yn mynd at achosion mor deilwng, ond am ei gynrychiolaeth o'r cyfnodau cloi a'r cyfyngiadau ar ein bywydau yn y cyfnod hwnnw '.

Bydd Hefin David, AS Caerffili yn cyflwyno’r blancedi eleni i Llamau, yn cefnogi Llochesi Merched, ac i’r prosiect Warm Hug, rhan o’r Rhwydwaith Rhieni yng Nghaerffili.

Mae un flanced hefyd wedi’i rhoi i’r teulu cyntaf o ffoaduriaid o Afghanistan i gael eu cartrefu ym Mwrdeistref Caerffili, fel anrheg i’w croesawu.

​